శ్రీ హేమలంబ మాఘ పూర్ణిమ 31 జనవరి 2018 బుధవారం కర్కాటకరాశిలో పుష్యమి,ఆశ్లేష నక్షత్రాలలో రాహుగ్రస్తంగా రక్తవర్ణంలో సంపూర్ణ చంద్రగ్రహణం సంభవించును.ఇది నీలిరంగులో (బ్లూ మూన్ గా) ఉండదు. కేవలం రక్త వర్ణం మాత్రమే.ఈ చంద్ర గ్రహణం వలన ఎవరు ఆందోళన చెందాల్సిన అవసరం లేదు.

Sunday, January 28, 2018

ధనూరాశి శనికి అష్టమాధిపతైన చంద్రునికి మొదటి సంపూర్ణ చంద్రగ్రహణం -భాగం 4

శ్రీ హేమలంబ నామ సంవత్సరం మాఘ పూర్ణిమ సరియగు తేదీ 31 జనవరి 2018 బుధవారం కర్కాటక రాశిలో పుష్యమి, ఆశ్లేష నక్షత్రాలలో రాహు గ్రస్తంగా సంపూర్ణ చంద్ర గ్రహణం సంభవించనుంది. తూర్పు, ఆగ్నేయాల చంద్రునికి స్పర్శ ప్రారంభమై 76 నిముషాల పాటు సంపూర్ణ గ్రహణ బింబముండును. ఈ గ్రహణం ఆసియా, ఆస్ట్రేలియా, ఫసిఫిక్ ప్రాంతాలలో గోచరించును.

భారత కాలమాన ప్రకారం 2018 జనవరి 31 సాయంత్రం 5 గంటల 18 నిముషాలకు చంద్రునికి గ్రహణ స్పర్శ ప్రారంభమగును. అయితే ఈ సమయానికి దేశంలోని కొన్ని ప్రాంతాలలో సూర్యాస్తమయం కాకపోవచ్చును. కనుక సూర్యుడు అస్తమించిన ప్రాంతాలలోనే స్పర్శ కనపడును.

ముఖ్యంగా గర్భవతులు విషయంలో గ్రహణం చూడకూడదని అందరికీ తెలిసినటువంటిదే. అయితే గ్రహణ విషయాలలో గ్రహణానికి ముందు, మరియు గ్రహణం తర్వాత ఒక గంట పాటు కాలాన్ని గర్భవతులు గుర్తుంచుకోవాలి. అదేమిటంటే ఛాయలోనే గ్రహణ  స్పర్శ ప్రారంభమవుతుంది. ఛాయలోనే గ్రహణం ముగింపు జరుగుతుంది. కానీ గ్రహణ ప్రారంభానికి ముందు ఒక గంట పాటు చంద్రుడు ప్రతిఛాయ (క్రీనీడ) లో ఉండును. అలాగే గ్రహణం తర్వాత కూడా ఓ గంట పాటు ప్రతిఛాయలో ఉండును. ప్రతిఛాయ అనగా చంద్రుడు తన తేజస్సును కోల్పోయి కాంతి విహీనంతో మసక  బారినట్లుగా కనపడును.

కనుక గ్రహణానికి గంట ముందు చంద్రుడు కాంతి విహీనమగును. తిరిగి గ్రహణం పూర్తయిన తర్వాత 60 నిముషాల పాటు కాంతి విహీనంతోనే చంద్రుడు కొనసాగును. ఆ తర్వాతనే తేజో కాంతితో చంద్రుడు కనపడును. జనవరి 31 రాత్రి 8 గంటల 41 నిముషాలకి గ్రహణం పూర్తయిననూ మరొక గంట పాటు అనగా 9 గంట పాటు అనగా 9 గంటల 41 నిముషముల వరకు మసక బారినట్లుగా ఉంటాడు. అనగా ఈ సమయం వరకు గర్భవతులు చంద్రుడిని చూడవద్దు. ముఖ్యంగా గర్భవతులు తమ తమ గృహాలలో అన్నీ పనులు చేసుకుంటూ తిరగవచ్చును. ఒక చోటనే ఉండాలని,అటు ఇటు తిరగకూడదని, మల మూత్ర విసర్జనకు కూడా వెళ్లకూడదని చెప్పేటటువంటి మాటలు సరియైనవి కావు. భౌతికంగా చంద్రగ్రహణమును చూడకుండా ఉంటే చాలు. టీవీ లలో ప్రసారాలు ప్రత్యక్షంగా చేస్తుంటే, చక్కగా చూడవచ్చును.

ప్రతి గ్రహణానికి 3 గంటల ముందు నుంచే ఆహార పదార్థాలను స్వీకరించరు. కనుక ఈ గ్రహణము రాత్రి 8 గంటల 41 నిముషాలకే ముగిసిపోవును కనుక ఆ తర్వాత భోజన పదార్థాలను తయారుచేసుకొని స్వీకరించవచ్చు. భారతీయ శాస్త్ర సంప్రదాయాల ప్రకారంగా భోజన పదార్థాలను మధ్యాహ్నం వరకు మాత్రమే వండుకొనేది. ఎక్కడా ఆందోళన చెందాల్సిన అవసరం లేదు.

భారత కాలమాన ప్రకారం సాయంత్రం 5 గంటల 18 నిముషాలకు గ్రహణం ప్రారంభమై, 6 గంటల 22 నిముషాలకు సంపూర్ణ  స్థాయికి చేరుతుంది. అక్కడ నుంచి రాత్రి 7 గంటల 38 నిముషాల వరకు సంపూర్ణ గ్రహణ బింబము రక్త వర్ణములో ఉండును. గ్రహణ విడుపు రాత్రి 8.38 నిముషాలకు ప్రారంభమై, 8.41 నిముషాలకు గ్రహణం ముగియును. తెలుగు రాష్ట్రాలలో మొదటిగా గ్రహణమును శ్రీకాకుళం జిల్లా వాసులు చూడగలరు.

సంపూర్ణ గ్రహణ బింబము 6 గంటల 22 నిముషాల నుంచి 7 గంటల 38 నిముషాల వరకు నిలబడును. ఈ సమయం అత్యంత విశేషమైనదిగా గుర్తించాలి. ఎందుకంటే సహజంగా గ్రహణ సమయాలలో భగవతారాధన చాలా విశేషమైనది. కొన్ని దేవత మంత్రములను ఉపాసించే వారు గ్రహణ సమయాలలో ఆయా మంత్రాలను పఠిస్తే అనేక రేట్లు పఠించిన ఫలితం వస్తుంది. అయితే గ్రహణ సమయాలను బట్టి , గ్రహణం జరిగే రాశిని బట్టి, జరిగే నక్షత్రాలను బట్టి, అనుష్టాన ఫలితాలు పలు రెట్లు పెరుగుతుంటాయి. చంద్రుని యొక్క రాశిలోనే చంద్రునికి రెండు నక్షత్రాలలో గ్రహణం సంభవిస్తూ, 76 నిముషాల పాటు స్థిర బింబము ఉండును కాబట్టి ఎవరైనా ఒక మంత్రమును ఒక్కసారి మనః స్ఫూర్తిగా విశ్వాసంతో పఠిస్తే, 10 లక్షల సార్లు పఠించినంత మహా పుణ్యం వచ్చును. కనుక స్థిర బింబమున్న 76 నిముషాలలో ఒక దేవత నామాన్ని (ఉదాహరణకు ఓం శ్రీమాత్రే నమః ) స్మరిస్తే 10 లక్షల సార్లు పఠించిన మహద్భాగ్యం కల్గును. కనుక ఉపదేశ మంత్రాలు ఉన్నటువంటి వారు ఆ సమయంలో శుచిగా దైవీ దేవతలను ప్రార్ధించవచ్చును. ఇక పట్టు స్నానాలు, విడుపు స్నానాలు చేయాలనే ఉద్దేశ్యంతో గృహంలోని వృద్ధులను, చిన్నారులను దయచేసి ఇబ్బంది పెట్టవద్దు. కేవలం బీజాక్షర సహితంగా మంత్రోపదేశం ఉన్నవారు మాత్రమే గ్రహణానికి పట్టు స్నానాలు, విడుపు స్నానాలు ఆచరిస్తారు.. అందరూ కాదు.

మొత్తం మీద ఈ గ్రహణం శాస్త్రవేత్తలు చెప్పినట్లుగా బ్లుమూన్ గా కనపడుతుందని శాస్త్రవేత్తలు చెప్పినప్పటికీ అది ఎట్టి పరిస్థితిలోను రక్త వర్ణములో ఉండును. నీలి రంగులో గ్రహణం కనపడదు. జనవరి నెలలో 2 పూర్ణిమలు వచ్చినందున, రెండవ పూర్ణిమ నాటి జాబిల్లిని శాస్త్రీయ పరిభాషలో బ్లూ మూన్ గా పిలుస్తారు. నీలి రంగులో చంద్రుడు మాత్రం కనపడదు. కేవలం రక్త వర్ణములోనే ఉంటాడు. సోషల్ మీడియా లో చంద్ర గ్రహణం యొక్క తీవ్రత అనేక మందిపై దారుణాతి దారుణంగా ఉంటుందని చెప్పే మాటలను దయచేసి నమ్మకండి. రాబోయే పోస్టింగ్ లో ప్రపంచ వ్యాప్తంగా చంద్ర గ్రహణ సమయాలను తెలుసుకుంటూ శని, చంద్రులను గురించి మరింత విశ్లేషించుకుందాం. - దైవజ్ఞ పొన్నలూరి శ్రీనివాస గార్గేయ

Saturday, January 27, 2018

ధనస్సులోని శనికి అష్టమంలో చంద్ర గ్రహణం - భాగం 3

ప్రస్తుతం ధనుస్సు రాశిలో శని సంచారం చేస్తున్నాడు. శనికి అంతర్గత శత్రువుగా ఉన్న చంద్రుడికి అష్టమ స్థానంలో రాహు గ్రస్తంగా కర్కాటక రాశిలో అనగా చంద్రుని యొక్క క్షేత్రంలోనే సంపూర్ణ చంద్ర గ్రహణం జరుగుతున్నది.

చంద్రుడు మనః కారకుడు. ప్రతివారు తమ గతాన్ని గురించి చింతించటమో లేక భవిష్యత్ ను గురించి భయపడటమో చేస్తుంటారు. ప్రతీవారూ తమ తమ గత అంశాలను తిరిగి బాగుచేయలేరు. అటువంటప్పుడు వాటిని అధికంగా ఆలోచించి సమయాన్ని వృధా చేసుకుంటూ భవిష్య స్థితిగతులలో కూడా ఒక్కోసారి తప్పుగా నిర్ణయాలు తీసుకుంటుంటారు. ఇక్కడే మనం కర్మను గురించి చెప్పుకోవాలి. కర్మ అనేది మనం సృష్టించుకున్నదే,  మనం అనుభవిస్తున్నదే. అలాగే గతంలో కూడా కర్మను మనం సృష్టించుకున్నాం. అదే విధంగా భవిష్యత్ లో కూడా మనమే స్వయంగా నిర్ణయాల ద్వారానో, క్రియల ద్వారానో కర్మను సృష్టించుకుంటూ ఉంటుంటాం. కనుక ఈ విధమైన అనుకూలమైన కర్మను కాకుండా కొందరు ప్రతికూలమైన కర్మలను స్వాగతించిన కారణంగా సమస్యలకు లోనవుతుంటారు.

పై విషయం అందరికి తెలిసినటువంటిందే. అయితే ఈ అంశాన్ని ఇప్పుడు ఎందుకు విశ్లేషిస్తున్నానంటే... శని ఆయుష్కారకుడు. అట్టి శనికి అష్టమమనే ఆయుస్థానంలో మనః కారకుడైన చంద్రునికి రాహుగ్రస్తంగా సంపూర్ణ చంద్ర గ్రహణం జరుగుతున్న క్రమంలో మన మన ఆలోచనలు అనేక పరంపరలుగా ఉంటుంటాయి.

మనస్సుని ఎంత నిర్మలంగా ఉంచాలన్నా కూడా, సాధ్యం కానీ రీతిలో ఉండును. కానీ మన ఆలోచనలు చేయకుండా, క్రియలు చేయకుండా జీవించలేం కదా.. ఈ ఆలోచనలు క్రియలు మనల్ని కొన్ని సమయాలలో సమస్యలు తెచ్చేవిగా ఉంటుంటాయి. మనం చేసే క్రియలు అనివార్యం అయినప్పటికీ, అట్టి క్రియలను నైపుణ్యంగా చేయటం చాలా ముఖ్యం. కాబట్టి ప్రస్తుతం చంద్రునికి జరిగే సంపూర్ణ గ్రహణం 76 నిముషాల పాటు స్థిరంగా ఉంటుంది.

ఈ స్థిర చంద్ర గ్రహణబింబం కర్కాటక రాశిలో సంభవిస్తున్నది. దీని ప్రభావం కర్కాటక రాశి మీదనే ఉంటుందనుకోవటం పొరపాటు. ద్వాదశ రాశుల వారికి ఒక్కొక్క స్థానంలో ఈ గ్రహణం జరుగుతూ ఉంటుంది. ఉదాహరణకు మేష రాశి వారికి 4వ స్థానంలో, వృషభ రాశి వారికి 3వ స్థానంలో, మిధున రాశివారికి 2వ స్థానంలో, కర్కాటక రాశి వారికి జన్మ రాశిలో, సింహ రాశి వారికి 12వ స్థానంలో, కన్యా రాశి వారికీ 11వ స్థానంలోనూ, తులా రాశి వారికి దశమ స్థానంలోనూ, వృశ్చిక జాతకులకు నవమ స్థానంలో, ధను రాశిలో జన్మించిన వారికి అష్టమ స్థానంలోనూ, మకర రాశి వారికీ సప్తమ స్థానంలో, కుంభ జాతకులకు ఆరవ  స్థానంలో, చివరిదైన మీన రాశివారికి పంచమ స్థానంలో చంద్ర గ్రహణం సంభవిస్తున్నది.

అంటే ప్రతి రాశి వారికీ ఒక్కో స్థానంలో ఈ గ్రహణం ఉన్నదని భావము. అంతమాత్రం చేత కంగారుపడి ఆందోళన చెందాల్సిన అవసరం లేదు. మరికొంత లోతులకి వెళితే ఒక్కో రాశిలో మూడు నక్షత్రాలు కూడా ఉంటుంటాయి. ఉదాహరణకు మేష రాశే ఉందనుకుందాం. ఇందులో అశ్విని, భరణి మరియు కృత్తికా నక్షత్ర 1వ పాదం వారు ఉంటారు. గ్రహణం సంభవించేది పుష్యమి, ఆశ్లేష నక్షత్రాలలో జరుగుతున్నదన్నమాట. అప్పుడు అశ్విని వారికి ఆ నక్షత్రాలలో పట్టే గ్రహణం వలన ఎలాంటి జాగ్రత్తలు తీసుకోవాలి, భరణి జాతకులకు ఆ నక్షత్రాలలో ఉండే సంపూర్ణ గ్రహణం ఏ అంశాల మీద ప్రభావం ఉంటుందో, వాటి పైన జాగ్రత్తలు తీసుకోవటం.. అలాగే  మూడవ నక్షత్రం కూడా.

కనుక ఈ సంపూర్ణ చంద్ర గ్రహణం వలన కొన్ని రాశుల వారికీ గండాలు ఉంటాయని.. కొన్ని రాశుల వారు కోటీశ్వరులు అయిపోతారని.. కొన్ని రాశుల వారు దరిద్రులైపోతారని చెప్పే వీడియోలలాంటివి సోషల్ మీడియా లో విపరీతం అయిపోతున్నాయి. వీటి వలన ప్రజలు భయ భ్రాంతులకు గురవుతున్నారు. కనుక వీటిని గురించి దయచేసి నమ్మకండి. అదిగో పులి అంటే ఇదిగిదిగో తోక అన్న చందంగా ఉంటుంది వారి విశ్లేషణలు. కనుక దయచేసి నిర్భయంగా ఉండండి.

మరికొన్ని చోట్ల గ్రహణ ప్రభావం తొలగటానికి గాను శేరుంబావు బియ్యం దానం చేయండని, లేకపోతే సమస్యలు చుట్టు ముడతాయని చెప్పేవారు కూడా ప్రస్తుత రోజులలో అధికమయ్యారు. కనుక ఈ సంపూర్ణ చంద్ర గ్రహణ ప్రభావం దారుణాతి దారుణంగా ఉండనే ఉండదు. ద్వాదశ రాశులలో జన్మించిన వారు కొన్ని కొన్ని జాగ్రత్తలను, కొన్ని కొన్ని అంశాలలో కొన్ని కొన్ని రోజులలోనే తీసుకుంటే చాలు.

ఎందుకంటే మనం చేసే ఆలోచనల వలెనే ఆటంకాలు, అవరోధాలు ఏర్పడుతుంటాయి. ఆలోచనలు లేవనుకోండి... ఎట్టి అవరోధాలు ఉండవు. ఆటంకాలు అసలు కలగవు. మనం ఊహించినది ఊహించినట్లుగా జరగకపోతే ఆటంకాలు వస్తున్నాయి అని భావిస్తాం. .మన ఆలోచనలు అసలు సక్రమంగా ఉన్నాయా లేవా ఎలా చెప్పగలము. ప్రతి వ్యక్తి  తన ఇష్టాన్ని బట్టి, తనకి ఉన్నటువంటి అనుకూలతలని బట్టి, తనకి ఉండేటువంటి ప్రయోజనాలను బట్టి ఆలోచనలను చేస్తుంటాడు. ఇక్కడ ప్రతి ఆలోచనలోను వ్యక్తి ఒక్క స్వార్థ ప్రయోజనాలు దోగాడుతుంటాయి. స్వార్థం అనేది తొంగి చూస్తుంటుంది.

కనుక ఇలాంటి పరిస్థితులలో ప్రతి వ్యక్తి ఉంటున్నటువంటి సందర్భములోనే.. మనః కారకుడైన చంద్రుడికి గ్రహణం జరుగుతున్నది కనుక... మన ఆలోచనలు, మన విశ్లేషణలు, మన అంతరంగము అతిగా ఆశించటం జరుగుతుంటుంది. వీటి వలన విఫలాలు, వైఫల్యాలు కలగటం.. నిరాశకు లోను కావటము వెంట వెంటనే జరుగును. అందుచేత ఆటంకాలు రాకుండా మన ఆలోచనలు స్థాయిని దాటి పోకుండా సరియైన మోతాదులో ఉంటూ ఉండాలంటే ప్రత్యేక సమయాలలోనే 27 నక్షత్రాల వారు జాగ్రత్తలంటూ తీసుకోవాలి.

కనుక ఈ ధనుస్సు రాశిలో శని సంచారమున్న మొత్తం సమయంలో వరుసగా మూడు సంపూర్ణ చంద్ర గ్రహణాలు  వస్తున్నాయి కాబట్టి వీటి ప్రభావం 2018 జనవరి 31 నుంచి 2019 జులై 21 వరకు ఉండును. కాబట్టి ఒక్కోరాశి వారు ఏ ఏ అంశాలలో జాగ్రత్తలు తీసుకోవాలి.. జాగ్రత్తలు తీసుకోవాలంటే మన మనస్సు మన ఆధీనంలోనే ఉండాలి. మరి మన ఆధీనంలో ఉండాలంటే ఉండగలుగుతుందా ?.. .ఉండలేదు. కనుక గ్రహణ ప్రభావం 76 నిముషాల పాటు ఉంది కనుక 27 నక్షత్రాల వారి కొన్ని ప్రత్యేక సమయాలలో.. .కొన్ని ప్రత్యేక పదార్థాలను ఆహార రూపంలో తీసుకున్నప్పుడు మనస్సును నియంత్రించవచ్చును. కాబట్టి తదుపరి పోస్టింగ్ లో చంద్ర గ్రహణ సమయాలతో పాటు.. వరుసగా ఒక్కొక్క రాశి వారు ఏ ఏ రోజులలో ఎలాంటి అంశాలలో జాగ్రత్తలు తీసుకోవాలో లోతైన విశ్లేషణతో తెలుసుకోవటానికి ప్రయత్నం చేద్దాం. 


 - దైవజ్ఞ పొన్నలూరి శ్రీనివాస గార్గేయ

Wednesday, January 24, 2018

ధనస్సులోకి శని ప్రవేశం భాగం - 2

ధనుస్సు రాశిలోకి శని ప్రవేశం మొదటి భాగం చదివి ఉంటారు అనుకుంటాను. ఈ రెండవ భాగం నుంచి వెంట వెంటనే పోస్టింగ్లను అందచేస్తాను. జాగ్రత్తగా చదివి ఆకళింపు చేసుకుంటారని ఆశిస్తాను. జ్యోతిష శాస్త్ర రీత్యా శనికి అంతర్గత శత్రువు చంద్రుడు. శని అనగానే జ్యోతిష పరంగా ఆయుష్కారకుడని అర్థము. ఆయుస్థానం అనగానే ఏదో ప్రమాదం ముంచుకొస్తుంది భయపడేవారు చాలా మంది ఉంటారు.

ఇక్కడ ఆయుష్యు అంటే మనిషికి ఉన్న ప్రాణమని అర్థం కాదు. మన చేతిలో ఒక సెల్ ఫోన్ ఉందనుకుందాం. ఒక్కోసారి పొరపాటున పైనుంచి క్రిందపడి పగిలిపోవచ్చు లేదా కోపావేశాలతో విసిరి కొట్టవచ్చు. ఇక్కడ పొరపాటైనా, ఆవేశమైనా దానికి కారణము చంద్రుడే. .విసిరి కొట్టబడిన సెల్ ఫోన్ పగిలిపోయింది. అంటే దాని ఆయుష్యు తీరిపోయిందన్నమాట.

అలాగే ఓ క్రొత్త వాహనాన్ని ఓ వ్యక్తి నడపటం మొదలెట్టాడు. ఎన్నెన్నో బాధలతోనో, ఇతర వ్యాపకాలతోనో తన మనస్సును డ్రైవింగ్ మీద సక్రమంగా నిలపలేక పరధ్యానంగా ఉన్న కారణంగా ప్రమాదం జరిగి వాహనం ధ్వంసమైనది. అదృష్టవశాత్తు వ్యక్తి బతికి బయటపడ్డాడు. ఇక్కడ శనికి అంతర్గత శత్రువు చంద్రుడు పరధ్యానంగా ఉన్న కారణంగానే శని సంబంధమైన ఆ ఇనుప వాహనము ధ్వంసమైపోయింది.

పైన చెప్పిన ఉదాహరణ వలన ఆయుష్యనేది ఎలా ఉంటుందో అర్ధమైంది. అలాగే మానవుల ఆయుష్యు కూడా ఒక్కోసారి ఇదే శని చంద్రుల వలనే తీరిపోతుంటుంది. ద్వాదశ రాశులలో చంద్రుడు ఏ నక్షత్రంలో ఉంటాడో, ఆ నక్షత్రమే వ్యక్తులకు జన్మ నక్షత్రం అవుతుంది. ఉదాహరణకు అశ్విని నక్షత్రంలో జన్మించిన వారికి చంద్రుడు అశ్వినిలో ఉన్నాడని అర్థము. అలాగే పుష్యమి నక్షత్రంలో జన్మించిన వారికీ చంద్రుడు పుష్యమిలో సంచారం చేస్తున్నాడని అర్థము. అంటే 27 నక్షత్రాలలో జన్మించినవారికి చంద్రుడు ఆ నక్షత్రంలో ఉన్నాడనే అర్థము.

ఈ నేపథ్యంలో చంద్రుడున్న స్థానానికి, శని ఉన్న స్థానం లెక్కగట్టే ఫలితాలు చూస్తుంటాం. ఈ ఫలితాలలోనే రజత మూర్తి, తామ్రమూర్తి, లోహమూర్తి, సువర్ణమూర్తిగా ఫలితాలు ఉంటాయని ముందు భాగంలో చెప్పుకున్నాం. అయితే ఒక్కొక్క రాశికి శని యొక్క స్థితిని తెల్పబోయే ముందుగా చంద్రుడికి సంబంధించిన అతి ముఖ్యమైన అంశాన్ని ఈ సంవత్సరం ఒకసారి మనం గుర్తు చేసుకుందాం.

ఆయుస్థానము అనగా అష్టమ స్థానము. ప్రస్తుతం ధనుస్సు రాశిలో శని సంచారం చేస్తున్న తరుణంలో, శని ఉన్న రాశికి అష్టమ స్థానం ఎలా ఉందో పరిశీలిద్దాం. అనగా శని ధనస్సులో ఉంటే ఆ స్థానం నుంచి 8వ స్థానాన్ని లెక్కిస్తే, అది కర్కాటక రాశి అవుతుంది. ఈ కర్కాటక రాశికి అధిపతి చంద్రుడు. జ్యోతిష పరంగా ధనుస్సు రాశికి అష్టమాధిపతి చంద్రుడైనాడు. ఇట్టి చంద్రుడికి 2018 జనవరి 31 బుధవారం రోజున అదే కర్కాటక రాశిలోనే సంపూర్ణ చంద్ర గ్రహణం పుష్యమి నక్షత్రంతో ప్రారంభమవుతుంది. ఈ పుష్యమి నక్షత్రానికి అధిపతి శని.

ఈ గ్రహణం సంపూర్ణ స్థాయికి చేరిన తర్వాత 76 నిముషాల పాటు స్థిరమైన గ్రహణ బింబం నిలబడుతుంది. సరే ఇలాంటి గ్రహణాలు అప్పుడప్పుడు వస్తుంటాయి అనుకుందాం. కానీ ఈ సంపూర్ణ చంద్ర గ్రహణం జరిగిన తదుపరి 178 రోజులకు శని క్షేత్రమైన మకర రాశిలో మరో సంపూర్ణ చంద్ర గ్రహణం 2018 జూలై 27 న సంభవించనున్నది. ఈ గ్రహణము సంపూర్ణ స్థాయికి చేరిన తర్వాత 103 నిముషాల పాటు స్థిరంగా ఉండటం గమనార్హం.

ఈ రెండవ సంపూర్ణ చంద్ర గ్రహణం జరిగిన మరో 178 రోజులకు అనగా 2019 జనవరి 21న అదే కర్కాటక రాశిలోనే మూడవ సంపూర్ణ చంద్ర గ్రహణం 62 నిముషాల పాటు స్థిరబింబం గోచరించనుంది.

పాఠకులు ఇప్పుడు చెప్పే విషయాన్నీ బాగా గమనించండి. వరుస మూడు సంపూర్ణ చంద్ర గ్రహణాలలో రెండు కర్కాటక రాశిలోను (చంద్రుని యొక్క స్వక్షేత్రము), ఒక గ్రహణము మకర రాశిలో (శని యొక్క స్వక్షేత్రము) జరుగుతున్నవి. 

పై మూడు గ్రహణాలలో మొదటిది శని నక్షత్రమైన పుష్యమిలోనే ఉంటుంది. కనుక ధనుస్సు రాశిలో ఉన్న శనికి అంతర్గత శత్రువు, అష్టమాధిపతి అయిన చంద్రునికి వరుస మూడు సంపూర్ణ గ్రహణాలు జరుగుతున్నాయి.  కనుక ఈ మూడు సంపూర్ణ చంద్ర గ్రహణాలు మకర కర్కాటక రాశులలోనే జరగటం, పైగా చంద్రునికి సంభవించటము ఈ చంద్రుడు ద్వాదశ రాశులలో సువర్ణ రజత తామ్ర లోహ మూర్తులుగా ఉంటున్న కారణంగా వాటి వాటి ప్రభావాలు ఆలోచన చేయవలసిన విధి విధానాలు వెంట వెంటనే తెలుసుకోవటానికి ప్రయత్నం చేద్దాం.

సహజంగా ఒక గ్రహణం జరిగితే దాని ప్రభావం కొద్ది రోజులుంటుందని జ్యోతిష నిర్ణయం. పైగా గ్రహణ స్థాయిని బట్టి (పాక్షికంగా లేక సంపూర్ణము గాని), సంపూర్ణ గ్రహణ స్థిర బింబము ఉన్న సమయాన్ని బట్టి ప్రభావము యొక్క పీరియడ్ ఉంటుంది.

2018 జనవరి 31 బుధవారం నాడు సంభవించే సంపూర్ణ చంద్ర గ్రహణ ప్రభావం 6 మాసాలు ఉంటుంది. అనగా 2018 జూలై 31 వరకు ఉండునని భావము.

కానీ 2018 జూలై 27న మరొక సంపూర్ణ గ్రహణము 103 నిముషాల పాటు ఉండటంతో, తిరిగి దాని ప్రభావం 6 మాసాలు అనగా 2019 జనవరి 27 వరకు ఉండును. కానీ 2019 జనవరి 21న మరొక సంపూర్ణ చంద్ర గ్రహణం 62 నిముషాలు స్థిరబింబం సంభవించనున్న కారణంగా, దీని ప్రభావం కూడా అక్కడ నుంచి 6 మాసాలు ఉండును.

అంటే 2018 జనవరి 31 నుంచి 2019 జూలై 21 వరకు వరుస సంపూర్ణ చంద్ర గ్రహణాలు ప్రభావం ఉంటుందని అర్థము. ఈ వరుస మూడు గ్రహణాల అధిపతి చంద్రుడే  ధనుస్సు రాశిలో ఉన్న శనికి అష్టమాధిపతి కావటం విశేషం. కనుక ధనుస్సు రాశి సంచారంలో ఉన్న శని సమయంలో వరుస మూడు గ్రహణాలు రావటాలు, వాటి ప్రభావాలు, వీటికి ద్వాదశ రాశుల వారు తీసుకోవాల్సిన జాగ్రత్తలతో పాటు, ఈ గ్రహణాలు ఏ ఏ సమయాలలో.. ఏ ఏ ప్రాంతాలలో కనపడతాయి పరిపూర్ణంగా మూడవ భాగంలో తెలుసుకుందాం. - దైవజ్ఞ పొన్నలూరి శ్రీనివాస గార్గేయ